ВЕНЕДДЕР

ВЕНЕДДЕР, в е н е т т е р, в е н д д е р (лат. venedi, veneti) – 1) байыркы мезгилдерде Адриатика деӊизинин түндүк жээктерин мекендеген уруулар, алар По дарыясынан түндүк-чыгышка карай отурукташкан. Аталган уруулардын келип чыгышы тууралуу маселе илимде так чечилген эмес. 2) Рим императору Цезардын Галлияга жасалган жүрүштөрүнүн (б. з. ч. 58–51-жылдар) учурунда каратылган кельт уруусу. 3) Венеддер – славян урууларынын батыш канаты. Венеддер аталышы б. з. 1-кылымынан тарта кездешет. Алар Висла дарыясынын боюнда, Балтика жээктеринде жана Дунайдын төмөнкү агымында отурукташкан. Плиний менен Тацит Венеддерди сарматтарга, готт тарыхчысы Иордан (6-кылым) славяндарга таандык деп эсептеген. 7–8-кылымдарда Венеддердин бир бөлүгү чыгыш славяндарга аралашкан деген божомол айтылат. Орто кылымдарда немецтер славяндарды Wenden, Winden деп аташкан.