ВЕСТМИНСТЕР СТАТУТУ (1931)
ВЕ́СТМИНСТЕР СТАТУТУ (1931) – Британ империясынын доминиондоруна ички ж-а тышкы иштеринде өз алдынчалыкты берүү, метрополия м-н теӊ укуктуулугун бекемдөө тууралуу мыйзам. 1926-жылы ж-а 1930-жылы империялык конференцияларда Канада, Жаӊы Зеландия, Австралия Союзу, Түштүк-Африка Союзу, Эйре (Ирландия) ж-а Ньюфаунленд доминиондору Британ Шериктештигинин курамында толук өз алдынчалуулукту берүүнү талап кылышкан. Натыйжада парламент тарабынан жактырылган Вестминстер статуту кабыл алынып, ал боюнча ар бир доминиондун ички-тышкы иштерин өз алдынча жүргүзүү, чет өлкөлөр м-н дипломатиялык байланыштарды түзүү ж-а Улуттар Лигасына өз өкүлдөрүн жөнөтүү укугу берилген. Вестминстер статуту 1949-жылы толукталып, республикаларга (мисалы, Индияга) Британ Шериктештигине мүчө болууга мүмкүндүк берген.