ГАПАРОВ
ГАПАРОВ Мурза (22. 3. 1936, Ош облусу, Ноокат району, Нойгут айылы – 14. 11. 2002, Бишкек) – жазуучу, драматург ж-а киносценарист, Кыргыз ССРинин искусствого эмгек сиӊирген ишмери (1986), Кыргыз
эл жазуучусу (1998). КМУнун филология факультетин бүтүргөн (1962). Тажикстандын Мургаб районундагы окутуу кыргыз тилинде жүргүзүлгөн мектептерде мугалим (1962), Кыргыз мамлекеттик радиоуктуруу ж-а телекөрсөтүү комитетинде редактор (1963–65) болгон. 1965–67-жылдарда Москвадагы киносценаристтердин курсунда окуган. «Кыргызфильм» (1968), «Кыргызтелефильм» (1970) студияларында редактор, Ош шаарындагы Кыргыз драма театрында адабий бөлүмдүн башчысы (1974), Кыргызстан жазуучулар союзунун Ысык-Көл облусу боюнча адабий кеӊешчиси (1984–86), «Заман Кыргызстан» гезитинин башкы редактору (1993–96), 2000-жылдан Кыргыз-Түрк «Манас» университетинде кафедра башчысы болуп эмгектенген. Жазуучунун «Бөтөн таканын изи» аттуу алгачкы аӊгемеси 1958-жылы «Жаш ленинчи» журналында жарыяланган. Гапаров – «Мейман» (1963), «Бир шиӊгил жүзүм» (1966), «Кара-Көлдүн каздары» (1973), «Күнөстүү арал» (1976), «Кызыл беде» (1980), «Чагылгандын огу» (1981), «Кар алдындагы арчалар» (1982), «Темир корук» (1984), «Жаӊгак токоюнун жомогу» (1989), «Таӊгут падышасынын кеги» (2002) ж. б. китептердин автору. Драматург катары «Туздуу чөл» (1989), «Биздин үйдүн Карлсону» (1983), «Мээримдүү Мээри» (1992), «Бар үмүтүм сенде, София Булан» (1993), «Жамгырлуу түндүн жомогу», «Өлгүм келет, спонсор керек» (1995, Г. Гапарова м-н авторлош), «Киотого кеткен жол» (1995), «Кызганчаак келиндердин кечеси» (1997) «Караван сарай» (1998, кызы А. Гапарова м-н авторлош), «Өткөн жылдагы кар кайда?» (2000) аттуу пьесалары республиканын ж-а Россиянын бир нече театрларында коюлуп, жогорку баага арзыган. Гапаровдун сценарийи боюнча «Көчө» аттуу толук метраждуу көркөм фильм ж-а бир нече кыска метраждуу даректүү фильмдер тартылган. Айрым аӊгемелери литва, татар, өзбек, француз, орус тилдерине которулган. Анын ысмы Ноокат районунун борборунда жайгашкан мектеп-интернатка берилген.
Т. Абдыразаков.