ГАРВАРД УНИВЕРСИТЕТИ

ГА́РВАРД УНИВЕРСИТЕТИ – АКШдагы окуу жайы. 1636-жылы коллеж катары Кембридж шаарыннда (Массачусетс штаты) уюшулган. 1639-жылдан Америкага эмиграцияга барган ж-а мүлкүнүн жарымын, китепканасын коллежге мураска калтырган англиялык министр, искусство бакалавры Ж. Гарварддын ысмында. 18-кылымдын аягына чейин Гарвард университетинде Библия ж-а байыркы тилдер гана окутулган. Кийин жаӊы тилдер, математика окутула баштаган. 19-кылымдын 1-жарымында медицина (1810) ж-а укук (1817) факультеттери кошулгандан кийин коллеж университетке айланган. Университеттин өсүшүнө белгилүү педагог, университеттин президенти (1869–1909) Ч. Элиот чоӊ салым кошкон. Жалпы билим берүүчү коллежден башка, гуманитардык ж-а табигый илимдер, укук, медицина, саламаттык сактоо, дин илими, мамлекеттик башкаруу, педагогика факультеттери, колдонмо физика, инженердик бөлүмдөрү болгон. Университетте обсерватория, китепканалар, музейлер иштейт. АКШнын 7 президенти Гарвард университетин бүткөн. Учурда Кыргызстандан барып билим алып жаткан студенттер да бар.