ГИДРОТЕХНИКА

ГИДРОТЕ́ХНИКА (гидро... ж-а техника) – илим ж-а техниканын суу ресурстарын (дарыя, көл, деӊиз, жер астындагы суу) эл чарбасында пайдалануу ж-а гидротехникалык курулмалардын жардамы м-н суу кырсыгынан сактануу маселелерин камтыган тармагы. Гидротехника колдонмо илим катары гидравлика, гидромеханика, гидрология, гидрогеология, кыртыш механикасы, курулуш механикасы, инженердик геология ж. б. илимдерге таянат ж-а суу чарбасын тейлөөчү инженердик илимдердин татаал комплекси болуп эсептелет. Гидротехникалык курулмаларды долбоорлоо ж-а конструкциялоо, куруу ж-а пайдалануу ыкмаларын иштеп чыгат. Гидротехника энергетика, ирригация муктаждыктары, ошондой эле суу м-н камсыз кылуу үчүн плотина м-н шлюздун, суу шилендисине каршы курулманын жаӊы типтерин, дарыя агымын жөнгө салуу ыкмаларын, ГЭСтин оригиналдуу конструкциясын иштеп чыгат; курама-бетон курулмаларынын жаӊы конструкциясын түзөт. Гидротехника гидрология, гидромеханика, гидравлика сыяктуу суу жөнүндөгү илимдерге таянат.

Ад.: Берг В. А. Основы гидротехники. Л., 1963; Гидротехнические сооружения/Под ред. Н. П. Розанова. М., 1978.