ГИДРОТЕХНИКАЛЫК БЕТОН

ГИДРОТЕХНИКАЛЫК БЕТО́Н – дайыма сууда турган же мезгил-мезгили м-н суу каптап туруучу курулуштарды ж-а алардын кээ бир бөлүктөрүн курууда колдонулуучу бетон; оор бетондун бир түрү. Гидротехникалык бетон суунун агрессивдүү аракетине каршы туруктуулугу, суу өткөрбөстүгү, суукка чыдамдуулугу, катууланууда жылуулукту аз бөлүп чыгарышы м-н мүнөздөлөт. Гидротехникалык бетондун сапаты ар кандай кошулмаларды кошуу м-н жогорулатылат. Гидротехникалык бетонду даярдоо үчүн портландцемент ж-а анын түрлөрү, толтургучтар катарында кум, шагыл, көлөмү 150 ммге чейин ж-а андан чоӊураак таштар пайдаланылат.