ГҮЛКАН

ГҮЛКАН (Althaea), а л т е й – өсүмдүктөрдүн гүлкайырлар тукумундагы уруусу. Көп жылдык чөп. Тамыры, тамыр сабагы жоон. Сабагынын узундугу 40–150 см, түктүү же түксүз. Жалбырагы саптуу, тегерек же сүйрүрөөк жумуртка сымал, чети араадай кесилген. Гүлү майда, топтошуп өсөт, кызгылт же мала кызыл. Топ гүлү шыпыргы сымал. Гүлкандын 12 түрү Европа, Азиянын мелүүн аймактарында кездешет. Кыргызстанда 8 түрү белгилүү. Өзөн жээктеринде, жер алдындагы суу жер бетине жакын аймактарда өсөт. Тамыры күзүндө казылып алынып кургатылат, андан жөтөлгө, ууланууга каршы дары-дармектер жасалат.