ВИРУНГА (улуттук парк)
ВИРУ́НГА – Конго Демокр. Респ-нын түн.-чыгышында, Уганда м-н Руанданын чегинде жайгашкан ул. парк. Аянты 7,9 миң км2. Жоголуп бараткан айбанаттарды коргоо максатында 1925-ж. уюшулган. Деңиз деңг. 800–5000 м бийиктикте жайгашкан. Ул. парктын аймагына саванна, нымдуу тропиктик токой мүнөздүү. Коргоого алынган айбанаттардын ичинен тоо горилласына эң ыңгайлуу шарт бар, ошол эле учурда көптөгөн башка жаныбарлардын, айрыкча пилдин, кериктин, бегемоттун, кафр чамусунун (жаныш) саны браконьерликтен туруктуу кыскарууда. Паркты, о. эле шимпанзе, түрдүү антилопалар, окапилер, арстандар, сөөлдүү доңуздар, кабыландар мекендейт. Суу ж-а саз куштары да көп. 1979-ж. Бүткүл дүйнөлүк мурастын, 1994-жылдан кооптуу кырдаалдагы объектилер тизмесине кирген.