ВОЛЬТА (Батыш Африкадагы дарыя)
ВО́ЛЬТА 1 – Батыш Африкадагы дарыя, негизинен Гананын аймагында. Кара ж-а Ак В. дарыяларынын кошулушунан пайда болот. Уз. (Кара В-нын башатынан) 1600 км, алабынын аянты 394 миң км2. Кара В. Бобо-Диуласо ш-нын (Буркина-Фасо) жанындагы дөңсөөлөрдөн башталып, Ак В. кошулганга чейин кристаллдык платодогу кенен өрөөн, ортоңку бөлүгүндө Гананын Буркина-Фасо ж-а Кот-д’Ивуар өлкөлөрү м-н болгон чегаралары (бул бөлүгү босоголуу), андан ары Акосомбо ш-на чейин түздүк аркылуу агат. Бул бөлүгүндө 1964-ж. плотина курулуп, В. өрөөнүндө Вольта суусактагычы пайда болгон. Чатына 110 км калганда деңиз боюндагы ойдуң аркылуу агып, Гвинея булуңуна куярда саздуу дельтаны пайда кылат. Суусунун орт. чыгымы чатында 1288 м3/сек. Ири куймасы – Оти (сол). Балык кармалат. Чатынан 400 км аралыкка чейин кеме жүрөт. Ири порттору: Япеи (Тамале-Порт; Ак В-да), Кете-Крачи, Акосомбо. ГЭС курулган.