ВИДЕО-АРТ
ВИ́ДЕО-АРТ (англис тилинен video art) – эксперименттик тажрыйбалык изилдөө нугунда пайда болгон (1960) көркөм искусствонун формаларынын бири. Видео-арттын негизин видеотехника менен жасалган тажрыйбалар, компьютердик жана телекөрсөткүчтүк сүрөттөө түзөт. Чындыкты иллюзия түрүндө берүүнү аныктаган техникалык коддун шарттуулугу менен маанилүүлүгүн заманбап видеотехниканы пайдалануу жана ар кандай жолдор менен тилди анализдөө аркылуу билсе болот.
Тилди анализдөө (бул жерде массалык коммуникациянын визуалдык каражаттар тили) Видео-артты концептуалдык көркөм искусство менен жакындатат. Бул тармакта Нам Джун Пайк (ал Видео-арттын негиздөөчүсү деп эсептелет), Кит Соньет, Уильям Уэгмен, Клаус Ринке, Брюс Науман, Лес Левин жана башка сүрөтчүлөр эмгектенишкен.