БЕКБОЕВА Алый
БЕКБОЕВА Алый (12. 6. 1886, Нарын обл., Нарын р-ну, Акталаа кыш. – 1977, ошол эле жер) – кыргыз саймачысы; Кыргыз ССРинин мад-тына эмг. сиң. ишмер (1959). Анын саймачылыкка, оймочулукка болгон кызыгуусу бала кезинен эле башталып, өмүрүнүн 56 жылын кыргыздын элдик көркөм колөнөрчүлүгүнүн өнүгүшүнө жумшаган. 1957-ж. жаштардын ж-а студенттердин Бүткүл дүйнөлүк 6-фестивалына көркөмдүгү б-ча айырмаланган 30дан ашуун тушкийиз, 25тей аяккап, 30 шырдак, ондогон боз үйгө боо-чуу жасап өткөргөн. 1958-ж. кыргыз ад-ты ж-а исквосунун Москвадагы он күндүгүнө катышкан. Б. – улуттук оймо-чийме ж-а кеште салуунун мыкты чебери. Саймаларында кыргыз жергесинин бай жаратылыш бөтөнчөлүгү, чеберчилигинин, ой жүгүртүүсүнүн молдугу ачылат. Б-нын колунан жасалган асем буюмдар Санкт-Петербургдагы этнография музейине, Москвадагы Чыгыш элдеринин көркөм өнөр музейине ж-а Кыргыз улуттук көркөм сүрөт иск-во музейине коюлган. КРдин эл сүрөтчүсү Гапар Айтиевдин «Саймачы Алый Бекбоева» деген эмгеги Кыргыз улуттук көркөм сүрөт иск-во музейинен орун алган. Б. Эмгек Кызыл Туу ордени м-н сыйланган.