БЕЛГРАД КОНФЕРЕНЦИЯСЫ
БЕЛГРА́Д КОНФЕРЕНЦИЯСЫ 1961-жылы 1–6-сентябрда Югославия, Индия, Индонезия, Египет ж-а Гана мамлекеттеринин демилгеси м-н Югославияда өткөн. Ага Алжир, Афганстан, Бирма, Гана, Гвинея, Индия, Индонезия, Ирак, Йемен, Камбожа, Кипр, Конго, Куба, Ливан, Мали, Марокко, Непал, Египет, Сауд Аравиясы, Сомали, Судан, Тунис, Цейлон, Эфиопия, Югославия катышкан. Боливия, Бразилия ж-а Эквадор өкүлдөрү байкоочу болушкан. Конференция колониализмди биротоло жоюу, жалпы ж-а толук куралсыздануу, коомдук-саясий түзүлүшү ар түрдүү мамлекеттердин тынчтыкта жанаша жашоосу, БУУнун ролу ж-а структурасы жөнүндөгү маселелерди талкуулаган; согуштук-саясий блокторго кошулбаган мамлекеттердин мамлекет ж-а өкмөт башчыларынын согуш коркунучу жөнүндө билдирүүсү м-н тынчтыкка үндөөсү ж-а Декларациясы кабыл алынган. Бул документтерде согуштук-саясий блокторго кошулбоо саясатынын принциптери аныкталган.