БЕРДИБАЕВ
БЕРДИБАЕВ Абдрашит (1916-жылы туулган, Чүй облусу, Москва району, Малтабар кыштагы – 1980, Фрунзе) – акын, төкмө ырчы, обончу, Кыргыз ССРинин маданиятына эмгек сиңирген кызматкер (1974). Ымыркай чагында эки көзү азиз болуп калган. Адегенде казактын домбрасын, 15 жашынан комуз черткен. Сарыкунан Дыйканбай уулунан «Жаныш- Байыш», «Кожожаш», «Болот менен Мөөр» («Ак Мөөр») дастандарын, обончу Ызакандын «Ак келин», «Сугатчы», «Бөдөнө-кыргый» деген ырларын үйрөнгөн. 1944–1953-жылдары Кыргыз мамлекеттик филармониясында ырчылык кесипте эмгектенет. «Түшүмдө», «Кызыл гүл», «Жыттаганда гүлүңдү», «Сирень гүлү», «Жүрөгүмдүн сырын ук», «Селкиге кат», «Сырга», «Кызылчачы келиндин ыры», «Жүгөрү», «Пахтачы келин», «Менин өлкөм» жана башка белгилүү ырлардын сөзүн, обондорун өзү чыгарган жанаа жумшак, мукамдуу үнү менен аткарган. «Сынга сыпат толгондо», «Батмажан», «Тракторчу кыз» аттуу ырларына А. Малдыбаев, Б. Эгинчиев, Б. Исаков жана башкалар обон чыгарган. Алгачкы ыры басма бетине 1938- жылы жарыяланган. Жыйнактары: «Ырлар жыйнагы» (1949), «Ырлар» (1958), «Добуш» (1965), «Адамдын жолу» (1965), «Тандалган ырлар» (1970), «Адамдарга ачык кат» (1970), «Даңктайм сени, Кыргызстаным» (1973). Айрым китептери орус тилине которулган.
Ад.: Алагушов Б. Булбулдар. Б., 1991.