БЕЛУ-ОРИЗОНТИ
БЕ́ЛУ-ОРИЗО́НТИ (Belo Horizonte) – Бразилиянын түштүк-чыгышындагы шаар, Минас-Жерайс штатынын административдик борбору (1897). Калкы 2,3 млн (2022). Серра-ду-Эспиньясу тоосунун этегинде жайгашкан. Темир ж-а автомобиль жолдор тоому. Аэропорту бар. 1895-жылы негизделген, 20-кылымдын 2-жарымында бир нече асман тиреген үйлөр курулган. Собор, университеттер (католик, искусство ж. б.), штаттын филология академиясы, калк китепканасы, искусство сарайлары (кинотеатрлар, китепканалар, сүрөт галереясы, театрлар ж. б.), тарых музейи бар. Ботаникалык бак уюшулуп, зоопарк иштейт. Өлкөнүн тоо кен өнөр жайынын (темир, марганец кенташтары, алтын, асыл таштар) борбору. Кара металлургия, электр-техника, текстиль, тамак-аш, химия, фармацевтика, полиграфия, булгаары-бут кийим өнөр жай ишканалары, шаардын айланасында «Фиат» автомобиль заводу иштейт. Белу-Оризонтиге жакын спорттук ж-а туристтик шаарча – Пампулья жайгашкан. Анда Сан-Франсиску чиркөөсү, казино, яхта-клуб, дансинг бар.