БАЙГАЗИЕВ
БАЙГАЗИЕВ Советбек Орозканович (6. 12. 1946-жылы туулган, Нарын облусу, Жумгал району, Кайырма айылы) - педагог, филология илимдеринин доктору (2002), профессор (1996), КРдин билим берүүгө эмгек сиңирген кызматкери (1998). КМУнун филология факультетин бүтүргөн (1969). Кыргыз телекөрсөтүүсүндө редактор (1971-72), «Кыргызстан маданияты» гезитинде кабарчы (1975-77), КР УИАда илимий кызматкер (1977-84), Кыргыз педагогика илим-изилдөө институтунда сектор башчы, директордун орун басары болуп иштеген (1985-93). 1993-2001-жылдарда И. Арабаев атындагы КМПУнун проректору, 2002-жылдан Кыргыз билим берүү академиясынын вице-президенти. 150дөн ашуун илимий эмгектин автору. Алар негизинен кыргыз адабиятынын, анын ичинде драматургиянын маселелерине, ошондой эле агартуу тарыхына арналган. «Иниме кат», «Калем изи», «Атуул жана Ата Журт», «Агай, эмне атынып өлгөн жоксуз!», «Кыргыз журту ободогу “бүркүттүн” көзү менен» сыяктуу көптөгөн сын ж-а көркөм публицистикалык чыгармалардын автору.
Эмг.: Ала-Тоодогу агартуу тарыхынын кыскача очерки. Ф., 1985; Кыргыз тили жана адабияты окуу китептерине коюлуучу талаптар. Ф., 1986; Жазуучунун чыгармачылык индивидуалдуулугун мектепте үйрөнүү. Б., 1993; Улуу «Манас» улутубуздун дил жана тил бешиги. Б., 1995; Нурмолдо XIX кылымдын туңгуч агартуучусу жана даанышман педагогу. Б., 1995; Манастаануу. Б., 2002.
М. Молдалиева.