БИШКЕК ШААРДЫК ТЕЛЕФОН СТАНЦИЯСЫ

БИШКЕК ШААРДЫК ТЕЛЕФО́Н СТАНЦИЯСЫ – Бишкек шаарынын телефон тармактарындагы байланыш каналдарын коммутациялоочу техникалык каражаттар тутуму жайгашкан мекеме. Бишкекте аскер горнизонун, штабын ж-а темир жол станциясы бириктирген 13 номерлүү бленкер коммутатору 1917-жылы орнотулуп, ал жергиликтүү телефон байланышын өнүктүрүүнүн башталышы болгон. 1954-жылга чейин шаардын телефон тармагында сыйымдуулугу 1400 номерлүү кол м-н тейленүүчү бир нече коммутатор иштечү. 1954-жылы Фрунзе шаарында республикада биринчи болуп 4000 номерлүү

автоматтык телефон станциясы (АТС) орнотулган. 1966-жылы алгачкы АТСтин сыйымдуулугу 4900 номерге кеӊейген. 1967-жылы модификациясы кыйла өркүндөтүлгөн 6400 номерлүү АТС-4 ишке киргизилген. 1969-жылы Чехия өндүрүшүнөн чыккан ПСК тибиндеги 1000 номерлүү координаттык станция биринчи болуп иштей баштаган. 1979-жылы 4000 номерлүү стационардуу координаттык АТС, 1983–93-жылдарда 55100 номерлүү 6 АТС ишке киргизилген. 1996-жылдан шаардык телефон тармагына учурдун талабына жооп берген Швеция өндүрүшүнүн жалпы сыйымдуулугу 27,0 миӊ номерлүү АХЕ-10 цифралык АТСи иштей баштаган. 2002-жылы 15088 номерлүү, 2003-жылы 20040 номерлүү цифралык АТС эксплуатацияга берилген. 2005-жылдын 1январына карата тармактын станциялык сыйымдуулугу 192300 номерге жеткен. Бишкек шаардык телефон станциясы азыркы жаӊы техника м-н жабдылууда. 2006– 07-жылдарда Бишкек шаардык телефон станциясынын бүт тармагын толук модернизациялоо жүргүзүлүүдө.

А. С. Баратбаев, М. Ж. Жумабаев.