БИШКЕКТЕГИ БАЛДАР МУЗЫКАЛЫК МЕКТЕБИ

БИШКЕКТЕГИ БАЛДАР МУЗЫКАЛЫК МЕКТЕБИ П. Ф. Шубин атындагы, 1939-жылдын 23-октябрында Кыргыз ССР ЭКСтин токтому м-н ачылган. 1948-жылы П. Ф. Шубиндин ысмы ыйгарылган. Окуу мөөнөтү 5–7 жыл. Фортепьяно, кылдуу, үйлөмө, урма, эл аспаптар ж-а хор бөлүмдөрү бар. Мектептин 300 орундуу концерттик залы, китепканасы, музыкалык аспаптарды оӊдой турган устаканасы бар. Класстар окуу программасынын талабына ылайыкташтырылган. Мектептин алдында хор, оркестр, вокалдык, аспаптык ансамблдер уюштурулган. Мектептин базасында ар дайым республикалык конкурстар, фестивалдар өтүп турат. 2005–06-окуу жылында 770 окуучу окуган.