ДАНАКЕР
ДАНАКЕР – 1) зергерчилик өнөрүндө металл буюмдарын бири-бирине ширетип бириктирүүчү желимдин өзгөчө түрү. Д-дин эрүү темп-расы Д-ленүүчү металлдардын эрүү темп-расынан төмөн болууга тийиш. Эрүү темп-расына жараша Д. жумшак ж-а катуу болуп бөлүнөт. Жумшак Д. коргошун, калай, висмут ж-а кадмийдин кошундуларынан алынат. Мунун ичинен коргошун-калайлуу Д. көпчүлүк металлдарды Д-лөөдө колдонулат. Алюминий ж-а магний куймаларынан жасалган буюмдарды Д-лөөдө калайцинк-кадмий, цинк-алюминий-кадмий ж-а калай-цинк-кадмий кошулмалары пайдаланылат. Катуу Д-ге жез, күмүш ж-а алардын куймаларынан жасалган Д-лер кирет. Катуу Д-лер м-н болот, чоюн, никель, жез, асыл металлдардан жасалган буюмдар Д-ленет. Зергерлер 100 г таза күмүшкө 50 г жез кошуп эриткенде, Д. ошол заттардагы ыплас нерселерди өзүнчө бөлүп чыгарат да, эки затты тазалап, бириктирип таштайт. Д. «бура» деп да аталат. 2) Араздашкандарды элдештирүүчү же жалпы эле бириктирүүчү, ынтымакташтыруучу. Ушундан улам «эки киши күнөкөр болсо, бир киши данакер» деген макал айтылып калса керек.