ДАРБЫЗ
ДАРБЫЗ (Citrullus Forsk) – ашкабактар тукумундагы бир же көп жылдык өсүмдүк уруусу. Тамыры көп тарамдуу, жерге 1 мден ашык кирет. Сабагы узун, оролуп же төшөлүп өсөт, жалбырагы жазы, айрым жыныстуу. Д. тоголок, сүйрү, жалпак, кабыгы агыш жашыл ж. б.; сулпу кызыл, кызгылт, айрымдарыныкы ак, сары. Д-дын жапайы, аш ж-а тоют түрү белгилүү. КМШ өлкөлөрүндө Төмөнкү Волга бою, Түн. Кавказ, Украина, Молдавия, Казакстан ж-а О. Азия респ-нда өстүрүлөт. Аш Д-ы желет, туздалат, маринаддалат, андан цукат жасалат. Д-да 11% кант болот. Тоют Д-ы чоӊ (салм. 10–15 кг), канттуулугу 2–3%. Жаӊы кезинде ж-а силос түрүндө бардык малга берилет. Д. ысык климаттуу жерде жакшы өсөт, топурактын күрдүүлүгүн анча талап кылбайт. Д. эгилүүчү жер күзүндө айдалат (25–27 см тереӊдикте), эрте жазда малаланып, эки жолу культивацияланат. Кырг-нда
эгилүүчү Д. сорттору: Жеӊүүчү, Мрамор, Мелитополь, Десерт ж. б.
Ад.: Михов А. С., Алипиева М. Практическое овощеводство. М., 1980. Ивлев А. Н. Справочник-словарь овощевода. Л., 1981.