ДЕЗОДОРАЦИЯ
ДЕЗОДОРА́ЦИЯ (дез... ж-а лат. odor – жаман жыт) – жагымсыз жытты жок кылуу же басаӊдатуу. Ар кандай таштандылар, адам ж-а жаныбарлар бөлүп чыгарган заттар, тамак-аш ж. б. чирип, ажыраганда жагымсыз жыт пайда болот. Кээ бир ө. ж. ишканаларында (өзгөчө тери, хим. ө. ж-да) байкалат. Санит. эрежелерди бузганда, коммуналдык тиричилик объектилерин кир кармаганда, чала желдеткенде, жеке гигиенаны сактабаганда жагымсыз жыт пайда болот. Аны болтурбоо үчүн азык-түлүктү туура сактоо, таштандыларды убагында жок кылуу, турак жайларды таза кармоо ж. б. зарыл. Санитария-гигиеналык талаптарды сактабаса, жагымсыз жыттуу газдар, чаӊ, суюк же коюу заттар бөлүнүп чыгып, абага аралашат, кийимге, чачка сиӊип, чөйрөгө тарайт. Терчил же өздүк гигиенаны сактабаган кишинин колоӊсосу, шыбоосу, териден, ооздон чыккан жыты да жагымсыз болот. Жагымсыз жытты жоготууда хим. ж-а физ. жолдор (атайын желдеткичтер, озондоо) колдонулат. Таштандыларды өз убагында чыгаруу же бир жерге жыйып, үстүнө топурак, кум, таш көмүр күкүмүн төгүп тумчулап, компост жасайт. Үстүнө хлорлуу акиташ, көк таш эритмесин сээп койсо натыйжалуу. Аба, дене, бут ж-а чачтын жытын жакшыртууда атайы дезодоранттар колдонулат.