«ДАТКАЙЫМ»СКРИПКАЧЫЛАР АНСАМБЛИ
АНСАМБЛИ – скрипкачы кыздар тобу. 1998-жылы Ч. Абдрахманованын демилгеси менен М. Абдраев атындагы Республикалык адистештирилген музыкалык мектептин, Москва, Алматы, Смоленск, Бишкек консерваторияларынын бүтүрүүчүлөрүнөн түзүлгөн. 1999-жылы Кыргыз Республикасынын Маданият министрлигинин чечими менен Кыргыз улуттук филармониясынын курамына кирген. Ансамблдин репертуарында 120дан ашуун музыкалык чыгармалар бар. Алар: И. С. Бахтын 2 скрипка үчүн ля-минор концерти, А. Вивальдинин 2 скрипка үчүн ля-минор концерти, С. Рахманиновдун «Элегиясы», С. Медетовдун «Скерцосу», К. Молдобасановдун «Саманчы жолу» балет-ораториясынан үзүндү,
Ж. Шералиевдин «Түшүмдөсүң» (иштеп чыккан К. Бодров) жана башкалар. Ансамбль республикада өткөрүлгөн фестивалдарга, кайрымдуулук концерттерине активдүү катышат. Кыргыз Республикасынын жаштар сыйлыгынын лауреаты (2007).
Ад.: Алагушов Б. Кыргыз улуттук филармониясы. Б., 2006.