ДАЕК

ДАЕК – салт боюнча тийиштүү кишилерге калыс­тык менен бөлүнүүчү же таркатылуучу мал, дүнүйө, ­мүлк, буюм-тайым. Кудалашуу, куда тосуу, ку­данын алдына барууда колдонулуучу ар түрдүү (аркан тосмой, баяндос салмай, көрүндүк, жүгүнүү, жеӊкетай, сүт акы, жүк көрүү, чылбыр тартар, дасторкон жыяр, жылкычылык, күйөө баштык жана башка) ырым-жырымдарда бе­рилүүчү мал, мүлк, акча, кийим, кездеме; ата­-эненин карыганда балдарына калтырылган мурасы же энчиси (жер, мал, үй, эмерек, дүнүйө, акча); сөөк коюу жөрөлгөсүнө ылайык тарка­тылуучу чачыла, мүчө, жыртыш, таберик жана башкалар. Ошондой эле жоокерчиликте бөлүштүрүлүүчү олжолор (мөрөй, байге, белек) да Даек деп аталган. Даекти так бөлүштүрүү үчүн атайын калыс адам – даек­чи дайындалган.

И. Молдобаев.