ДЕГА
ДЕГА́ Эдгар (19. 7. 1834, Париж – 27. 9. 1917, ошол эле жер) – француз живописчи, график жана скульптор. Парижде көркөм искусство мектебинде окуган (1855–1856). 1854–1859-жылдары Италияда Алгачкы Кайра жаралуу искусствосун үйрөнгөн. Портрет жана тарыхый сүрөттөрдүн композицияларын түзгөн («Беллеллинин үй-бүлөсү», 1858–1860, Париж). 1870-жылдарда импрессионизм өкүлдөрү менен жакындашып, ошол замандагы шаар турмушун, театр сахналарын («Ынтымак аянты», 1875-жылдар чени; «Абсент, 1876), адамдардын мүнөздөрүн, жашоо-турмушун («Кафенин террасасындагы аялдар», монотипия, пастель, 1877; «Үтүкчү аялдар», 1884) чагылдырган чыгармаларды жараткан. Сахнадагы бийчилердин сүрөттөрүн майрамдык шаӊ менен берген («Жылдыз», пастель, 1878), жумуштан чарчаган адамдарды («Бийден экзамен», пастель, 1880, өздүк жыйнак, Нью- Йорк) тарткан. 1910-жылдан скульптурада иштеп, балериналардын, суучулдардын, жылкылардын күтүлбөгөн позаларын-келбеттерин жараткан.
Ад.: Русаков Р. Дега. М., 1968.