ДЕЙМАНТ
ДЕ́ЙМАНТ Леонид Фёдорович (5. 6. 1913, Ташкент – 1979, Фрунзе) – живописчи, Кыргыз ССРинин искусствосуна эмгек сиӊирген ишмер (1972). Москвадагы 1905-жыл атындагы сүрөт педтехникумун бүтүргөн (1939).


Улуу Ата Мекендик согуштун катышуучусу. 1949–1952-жылдары Фрунзедеги сүрөт окуу жайында окутуучу. Деймант – тематикалык картиналардын чебери. Чыгармаларында кыргыз элинин бүгүнкү жана өткөн турмушу чагылдырылат. Негизгилери: «Токтогул сүргүндө», «Саанчы», «Окуучу кыз», «Ал өз өлкөсүн коргогон», «Анын өмүр жолу», «Келечектеги педагог», «Малчылар майрамы», «Мекен жаӊырыгы» жана башкалар.
Дейманттын чыгармалары республикалык, бүткүл союздук көргөзмөлөргө коюлган. Эки Кызыл Жылдыз, «Ардак Белгиси» ордендери жана медалдар менен сыйланган.