ДАЛИЛДЕР
ДАЛИЛДЕР – жазык, жарандык иштердин, конституциялык сот өндүрүшүндөгү ж-а администрациялык укук бузуулар тууралуу иштерди териштирүүдө мааниси бар жагдайлар жөнүндөгү анык маалыматтар. Бул маалыматтар күбөлөрдүн, жабырлануучулардын, тараптардын, үчүнчү жактардын көрсөтмөлөрү ж-а буюм Далилдери, үн ж-а көрмө жазуулар, адистердин ж-а эксперттердин корутундулары м-н аныкталат. Жазык процессинде Далилдердин негизинде кылмыш окуясынын болгону же болбогону, айыпкердин кылмышка катышкандыгы же катышпагандыгы, кылмыштын себептери, айыпкердин жоопкерчилик даражасы, келтирилген зыяндын мүнөзү ж-а өлчөмү, ошондой эле кылмыш жасоого түрткү болгон жагдайлар аныкталат. Жарандык процессте Далилдердин жардамы м-н сот мыйзам тарабынан белгиленген тартипте тараптардын же ишке катышуучу башка адамдардын койгон доолоруна, талаптарына каршы чыгууга себеп болгон жагдайлардын, ошондой эле иштин туура чечилиши үчүн маанилүү башка кырдаалдардын бар же жок экендигин аныктайт. Далилдик мааниге ээ болгон маалыматтар күбө, жабырлануучу, шек саналуучу, айыпкердин, тараптардын көрсөтмөлөрүнөн, буюм Далилдеринен, эксперттин ж-а адистин корутундуларынан, тергөө ж-а сот иштеринин протоколдорунан ж. б. булактардан алынат.