ДАНАКЕР
ДАНАКЕР – 1) зергерчилик өнөрүндө металл буюмдарын бири-бирине ширетип бириктирүүчү желимдин өзгөчө түрү. Данакердин эрүү температурасы Данакерленүүчү металлдардын эрүү температурасынан төмөн болууга тийиш. Эрүү температурасына жараша Данакер жумшак жана катуу болуп бөлүнөт. Жумшак Данакер коргошун, калай, висмут жана кадмийдин кошундуларынан алынат. Мунун ичинен коргошун-калайлуу Данакер көпчүлүк металлдарды Данакерлөөдө колдонулат. Алюминий жана магний куймаларынан жасалган буюмдарды Данакерлөөдө калай цинк-кадмий, цинк-алюминий-кадмий жана калай-цинк-кадмий кошулмалары пайдаланылат. Катуу Данакерге жез, күмүш жана алардын куймаларынан жасалган Данакерлер кирет. Катуу Данакерлер менен болот, чоюн, никель, жез, асыл металлдардан жасалган буюмдар Данакерленет. Зергерлер 100 г таза күмүшкө 50 г жез кошуп эриткенде, Данакер ошол заттардагы ыплас нерселерди өзүнчө бөлүп чыгарат да, эки затты тазалап, бириктирип таштайт. Данакер «бура» деп да аталат. 2) Араздашкандарды элдештирүүчү же жалпы эле бириктирүүчү, ынтымакташтыруучу. Ушундан улам «эки киши күнөкөр болсо, бир киши данакер» деген макал айтылып калса керек.