ДАРЛИНГ
ДА́РЛИНГ (жергиликтүү эл жогорку агымын – Кондомайн, ортоӊкусун – Балоин, төмөнкүсүн – Бирри деп атайт) – Австралиянын түштүк-чыгышындагы дарыя, Муррейдин оӊ куймасы. Узундугу 2740 км, алабынын аянты 650 миӊ км2. Нью-Ингленд кырка тоосунун батыш капталынан башталып, чөл аркылуу агат. Орточо чыгымы 42 м3/сек. Кургакчылык жылы төмөнкү агымы соолуп калат. Сугатка пайдаланылат. Жаӊы Түштүк Уэльстин губернатору – Р. Дарлингдин урматына аталган.