ДАРЧЫ
ДАРЧЫ – эки тирөөчкө керилген аркандын үстүндө оюн көрсөтүүчү цирк артисти. Дарчы байыртадан эле Рим, Кытай жана Персияда болгон. Орто кылымда Орто Азияга, Кавказга, Европага, кийинчерээк Түштүк Америкага, XIX кылымдын 2-жарымында Россияга тараган. Дарчы эл чогулган жыйында музыканын коштоосу менен ачык аянттарда оюн көрсөткөн. Шартка жараша дардын бийиктиги ар кандай болуп, аркан ар түрдүү материалдан эшилет.
Кийинчерээк Дарчынын оюну цирк артисттеринин программасына кеӊири кирди. Белгилүү Дарчылар: орус Дарчылары Свириндер, Тарасовдор (1920–1950), Хибиндер (1940–1950), Волжанскийлер (1950–1970), өзбек Дарчлары Ташкенбаевдер (1940–1970), дагстандык «Цовкра» коллективи (1930–1970). Кыргыз циркинде С. Байбориева, бир тууган С. жана М. Субанбековдор мыкты Дарчылар катары таанымал.