ДАУТОВ

ДАУТОВ Кадыркул (10. 9. 1940-жылы туулган, Ош облусу, Алай району, Үч-Дөбө айылы) – адабиятчы, сын­чы, Кыргыз Республикасынын маданиятына эмгек сиӊирген ишмер (2000), филология илимдеринин кандидаты (1973). 1978-жылдан СССР жазуучулар союзу­нун мүчөсү. Кыргыз Мамлекеттик университетинин филология факультетин бүтүргөн (1969). 1970–1973-жылдары СССР илимдер академиясынын М.Горький атындагы Бүткүл дүйнө­лүк адабият институтунун аспирантурасында окуган. 1973-жылы Кыргыз советтик энциклопедиясында адабият жана искусство ре­дакциясынын баш­чысы, 1974–1975-жылдары Кыргыз ССР илимдер академиясынын тил жана адабият институтунда илимий кызматкер, 1976–1981-жылдары сектор башчысы, 1983–1985-жылдары Кыргыз мамлекеттик университетинде оку­туучу, 1985–1986-жылдары «Кыргызстан маданияты» жу­малыгынын бөлүм башчысы, 1989–1999-жылдары кай­радан Кыргыз Республикасынын Улуттук илимдер академиясынын тил жана адабият институтунун бөлүм башчысы, 1999–2005-жылдары Чүй университетинде кафедра башчысы болуп иштеген. И. Арабаев атындагы Кыргыз мамлекеттик педагогикалык университетинин (2005–2006), Ж. Баласагын атындагы Кыргыз мамлекеттик университетинин профессору (2007). Даутов 1960-жылдардын экинчи жарымынан бери адабий-сын майданында эмгектенип, көркөм дүйнөнү, эстетикалык дөөлөт, нарк-насилди иде­ологиялык, саясий чен өлчөмдөр менен караган совет доо­рунда нукура адабияттын өӊүтүнөн көркөм ойлоо­нун оригиналдуулугун, нукура поэзия маселе­лерин козгогон көптөгөн макалаларды жарат­кан. «Ырдын өмүрү» аттуу алгачкы адабий-сын макалалар жыйнагы 1977-жылы жарык көргөн. Даутов – классикалык эстетиканын мектебинен өт­көн, жандуу туюм-сезимге эгедер, адабий жанр­лары менен көркөм сындын бардык түрлөрүнө эр­кин кире билген, өз сөзү, туруктуу өӊүтү бар, кыр­гыз, орус тилинде бирдей жаза билген универсал адис. Даутов – «Жаӊы чектерге» (1980), «Главное-по­иск» (1982), «Сөз өнөрүнүн эстетикасы» (1984), «Таланттар жана тагдырлар» (1988), «Тереӊдик­тер жана бийиктиктер» (1991), «Мезгил сыны жана мен» (2004), «Түркүн дүйнө элестеринен» (2005), «Издегеним тубаса акын, тунук поэзия» (2008) аттуу адабий-сын макалалар жыйнакта­рынын, «Адабий сын кантип жаралган?» (2002), «Албан кырдуу алп акындын дүйнөсү» (2003) де­ген монографиялардын автору.