ДЕГЭЭ
ДЕГЭЭ – балыкты сайып кармоо үчүн атайы жасалган курал. Дегээнин ачалары он экиге жетет. Ачаларынын саны, узундугу, жоондугу сайылчу балыкка жараша ар кандай болот. Сайылган балык чыгып кетпес үчүн Дегээнин ар бир ачасына бөрү тил бекитилет. Ал жыгачтан же темирден жасалат. Узундугу 2–3 м, жоондугу 15–20 см жыгачка сапталат. Анын 2-учуна узун, бышык ичке жип байланат. Дегээге сайылган балык тартканда жиптен кармашкан. Кыргыздар балыкчылыкты атайы кесип кылбаса да, балык кармоо үчүн түрлүү торлорду, желелерди, кайырмакты пайдаланышкан.
И. Молдобаев.