ДЕЗОДОРАЦИЯ

ДЕЗОДОРА́ЦИЯ (дез... жана латынча odor – жаман жыт) – жагымсыз жытты жок кылуу же ба­саӊдатуу. Ар кандай таштандылар, адам жана жаныбарлар бөлүп чыгарган заттар, тамак-аш жана башка чирип, ажыраганда жагымсыз жыт пайда болот. Кээ бир өнөр жай ишканаларында (өзгөчө тери, химиялык өнөр жайында) байкалат. Санитардык эрежелер­ди бузганда, коммуналдык тиричилик объекти­лерин кир кармаганда, чала желдеткенде, жеке гигиенаны сактабаганда жагымсыз жыт пайда болот. Аны болтурбоо үчүн азык-түлүктү туура сактоо, таштандыларды убагында жок кылуу, турак жайларды таза кармоо жана башкалар зарыл. Са­нитаридык-гигиеналык талаптарды сактабаса, жа­гымсыз жыттуу газдар, чаӊ, суюк же коюу зат­тар бөлүнүп чыгып, абага аралашат, кийимге, чачка сиӊип, чөйрөгө тарайт. Терчил же өздүк гигиенаны сактабаган кишинин колоӊсосу, шы­боосу, териден, ооздон чыккан жыты да жагым­сыз болот. Жагымсыз жытты жоготууда химиялык жана физикалык жолдор (атайын желдеткичтер, озон­доо) колдонулат. Таштандыларды өз убагында чыгаруу же бир жерге жыйып, үстүнө топурак, кум, таш көмүр күкүмүн төгүп тумчулап, ком­пост жасайт. Үстүнө хлорлуу акиташ, көк таш эритмесин сээп койсо натыйжалуу. Аба, дене, бут жана чачтын жытын жакшыртууда атайы дезодоранттар колдонулат.