ДЕЙВИС

ДЕ́ЙВИС , Д э в и с (Davis) Уильям Моррис (12. 2. 1850, Филадельфия – 5.2.1934, Пасадена) – америкалык геолог ж-а географ. Гарвард университетин бүткөн (1870). 1876-жылдан анда иштеген (1890-жыл­дан профессор). Америкалык географтар ассоциациясын не­гиздеген (1904) ж-а Америкалык геологдор коомунун президенти (1911), бир нече геология ж-а гео­графия коомдорунун (анын ичинде Россия) ардактуу мү­чөсү. 1890–1915-жылдарда АКШда геология кызматында эмгектенген. Батыш Европа, Түштүк Америка өлкө­лөрүндө ж-а АКШнын ар кайсы аймактарында изилдөө иштерин жүргүзгөн. 1903-жылы Түркстан­дын чөлдүү аймагында болгон. 1890-жылы географиялык цикл жөнүндө окууну иштеп чыгып, рельефтин өөрчүү баскычтарына түшүнүк берген ж-а цикл­дерге бөлгөн. Дейвистин бул окуусу тез тарап, гео­морфологиянын өнүгүшүндө чоӊ роль ойногон. Анын окуусунун кемчилиги рельефтин өөрчүү циклин жалпы геологиянын тарыхы ж-а ички, тышкы күчтөр м-н байланыштырбаганы бол­гон. Дейвис геоморфология мектебин түзгөн. Физикалык географияны окутууга зор көӊүл бөлгөн. Рель­ефти сүрөттөөнүн жаӊы типтерин – блок-дио­грамманы, рельефтин моделин киргизген.

Эмг.: Геоморфологические очерки. М., 1962.

Ад.: Герасимов И. П. О роли В. М. Дэвиса в разви­тии современной геоморфологии//Изд. АН СССР. Серия географическая. 1956, № 1.