ДАН САПАТЫН БААЛОО
ДАН САПАТЫН БААЛОО – дандын касиеттеринин ж-а белгилеринин жыйындысын колдонулушуна (тамак-аш, тоют, техникалык максаттарга) жараша керектөөлөрдү канааттандырууга жарамдуулугун, ошондой эле көпкө сактоо мүмкүндүгүн аныктоо. Дан сапатын баалоо так аныкталган методика боюнча жүргүзүлгөн анализдин натыйжасында бир нече көрсөткүчтөр м-н аныкталат. Дандын сапаттык көрсөткүчтөрү мамлекеттик стандартта берилген. Аларга – дандын жаӊылыгы (түсү, жыты, даамы), кычкылдуулугу, чөп-чардын болушу, илдет ж-а зыянкечтерге чалдыгуусу, нымдуулук, көлөмдүк массасы, 100 даана дандын массасы ж. б. кирет. Данды технологиялык жактан баалаганда (ун салдырууда ж-а нан бышырууда) анын тунуктугу, белоктун болушу, клейковинанын саны ж-а сапаты аныкталат, ошондой эле алынган ундан нандын үлгүсү бышырылат. Бышырылган нандын көлөмдүк чыгуусу ж-а формасын сактоосу бааланат. Дан сапатын баалоо топтор (партия) боюнча, башкача айтканда сапаты бир өӊчөй, бир мезгилде кабыл алууга, тапшырууга же жөнөтүүгө арналган анын ар кандай сан өлчөмү боюнча жүргүзүлөт. Тандап алуунун ж-а бөлүүнүн ыкмалары мамлекеттик стандарттар м-н чектелет ж-а так аткарылууга тийиш.