ДИАГНОСТИКА
ДИАГНО́СТИКА (гр. diagnōstikjs – аныктап билүүгө жөндөмдүү), д а р т а н ы к т о о – ооруну аныктоо ж-а табуу ыкмалары жөнүндөгү илим. Диагностика оорулуу адамды бардык жагынан ыраттуу изилдөөгө негизделген. Алар анамнез чогултуу; дене абалын изилдөө ооруган жерди кармалап, каккылап көрүү, тыңшоо, атайын ыкма м-н көзүн, кулагын, рефлексти, муун кыймылын ж. б. текшерүү); лабораториялык, рентгендик, электр диагностикалык изилдөөлөр, эндоскопия, биопсия ж. б. Кээ бир ооруларды аныктоодо радиоактивдүү изотоптор колдонулат. Жугуштуу ж-а аллергиялык ооруларды аныктоодо бактериологиялык, серол ыкмалардын мааниси чоӊ. Патологоанатомиялык Диагностика өлгөн адамдын тканын химиялык ж-а микроскопиялык текшерүү жолу м-н ишке ашырылат. Диагностика в е т е р и н а р и я д а жалпы ж-а атайын болуп бөлүнөт. Жалпы Диагностикада малдын тышкы көрүнүшү, териси, май кыртышы, лимфа түйүндөрү, былжыр челдери текшерилип, дене температурасы ченелет. Кан, заара, ичеги-карын кырындысын ж-а жүлүн суусун текшерүү атайын Диагностикага кирет. Диагностиканын клиникалык ыкмалары – ооруган жерди кармалап ж-а каккылап көрүү, зонд жуткуруу, рентгеноскопиялык ж-а графиктик изилдөөлөр.