ДИЕТА
ДИЕ́ТА (гр. diaita – жашоо шарты, тамактануу тартиби), м ү н ө з д ө п т а м а к т а н у у – тамак-аштын хим. курамы, физ. касиети, даярдалышы ж-а жаш өзгөчөлүгүнө ылайык атайын иштелип чыккан тамактануу тартиби. Дени сак адамдын мүнөздөп тамактануусун анын жашына, кесибине жараша тамактануу гигиенасы изилдейт. Ал эми сыркоо адамдар үчүн мүнөздөп тамактанууну иштеп чыгуучу ж-а сунуш кылуучу илим диетология деп аталат. Ооруга жараша түзүлгөн Д-ны сунуш кылуу адамдын организминдеги функциялык, патоморфол., зат алмашуунун бузулууларына, ферменттик өзгөрүүлөргө ж. б-га байланыштуу. Д. негизинен карын м-н он эки эли ичегинин жара оорусу, колит, өтө семирүү ж. б-да сунуш кылынат. Ооруга жараша Д-нын түрү болот. Туура тандалган Д. ар кандай дары каражаттардын таасирин күчөтүп, дарылоого жардам берет. Катуу кармаган оорунун өнөкөткө айлануусун алдын алууда Д-нын мааниси чоң. Ж а н ы б а р л а р д ы н Д-сы – ылаңдаган малды тоюттандыруу тартиби. Мында ылаңдын диагнозу, малдын абалы, жашы, породасы, жынысы ж-а кунардуулугу эске алынат. Малдын рациону жогорку сапаттуу, жеңил сиңүүчү, керектүү заттарга бай тоюттан турат.