ДИНАМОМЕТР
ДИНАМО́МЕТР (гр. denamis – күч ж-а ...метр) – күч ченегич; күчтү же моментти өлчөгүч курал. Ал күч звеносунан (серпилгич элементтен) ж-а саноочу түзүлүштөн турат. Д. иштөө принциби б-ча мех. (пружиналуу же рычагдуу), гидравликалык ж-а электрдик; арналышына жараша үлгү ж-а жумушчу болуп бөлүнөт. Үлгү Д. иштөөчү Д-ди текшерүүдө ж-а шкаласын градустарга бөлүүдө, түрдүү материалдар м-н буюмдардын мех. касиеттерин сыноодо, ал эми иштөөчү Д. жалпы ж-а атайын максат үчүн колдонулат. Жалпы максаттагы Д. м-н трактор, сүйрөгүч, локомотив ж. б-дын тартуу күчү өлчөнөт. Атайын максаттагы Д. аба ж-а гидравликалык винттердин тартуу күчүн, толгоо учурун, токтотуучу ж-а кесүүчү күчтөрдү өлчөөдө пайдаланылат. Күчтүн өлчөмүн жаза турган түзүлүшү бар Д. – динамограф, ал эми санды же көрсөткүч түзүлүшү бар Д. жумуш өлчөгүч деп аталат. Деформацияны электр сигналына өзгөртүүчү билдиргичтен ж-а сигналды күчөтүп жаза турган прибордон түзүлгөн электрдик Д. иш жүзүндө көп колдонулат. Мед. Д. адамдын ар түрдүү булчуң күчтөрүн өлчөйт.