ДИТРИХ
ДИ́ТРИХ Марлен (чыныгы аты-жөнү Мария Магдалена фон Лош) 27.12. 1901, Берлин – 6.5. 1992, Париж – нем. ж-а амер. актриса. Берлиндеги муз. академияны ж-а М. Рейнхардттын драмa иск-во мектебин бүтүргөн. 1922-жылдан театрда. Алгач киного 1923-ж. тартылган («Жолдогу эркек»). Реж. Ж. Штернбергдин «Көгүлтүр периште» фильминде ырчы Лола-Лоланын ролун аткарып, ийгиликке жетишкен.
1930-ж. режиссёру м-н бирге Голливудга чакырылып, «Марокко», «Шанхай экспресси», «Аксаргыл Венера», «Кызыл императрица», «Шайтан – ал аял» фильмдерине тартылган. Актриса ар кыл мүнөздөгү каарман тандаганга аракеттенген, күлкүлүү да, кайгылуу да ролдорду мыкты аткарган («Каалоо», «Периште», «Дестри кайрадан ээрде» ж. б.). Эстрада ырчысы катары да көп өлкөлөргө таанылган. «Нюрнберг процессиндеги» (1961) жесир аялдын образы ж-а «Кара түлкү» даректүү фильминде аткарган ролу аркылуу фашизмге каршы пикирин бекемдеген. 1978-ж. «Эң сонун күспуруш – бактысыз күспуруш» аттуу Батыш Германия фильмине тартылган. А. Пазылов.