ДОЛОН ЦИРКОН ЖАНА САПФИР КЕНИ
ДОЛОН ЦИРКОН ЖАНА САПФИР КЕНИ Нарын р-нунда, Нарын ш-нан 30 км түндүктө, деңиз деңг. 2500–3000 м бийиктикте жайгашкан. 1989-ж. циркондун чачындысы Оттук, Байдулу ж-а Туюк сууларынын тектирлеринен табылган. Циркондун өлчөмү 3Ч3Ч3 ммден жогору болгон бүртүктөрү кондициялык деп эсептелет. Циркон түссүз, саргыч жашыл өңдө. Циркондун тоотектеги өлчөмү 1,92 карат/м3 түзөт. Кондициялык циркондун чыгышы анын жалпы массасынан 10–15%ин түзөт. Корунд майда (2Ч1 ммге чейин) сыныктар түрүндө кездешет. Каралжын көк түстөгү сапфирдин салмагы 0,45 карат, өлчөмү 4Ч4Ч3 мм болгон кесеги табылган. Циркондун болжолдуу ресурсу 125249,6 каратты түзөт.