ДРЕЗДЕН СҮРӨТ ГАЛЕРЕЯСЫ
ДРЕ́ЗДЕН СҮРӨТ ГАЛЕРЕЯСЫ – Германиянын Дрезден ш-ндагы дүйнөдөгү атактуу сүрөтчүлөрдүн тандалган чыгармалары жыйналган көргөзмө (имарат). 1560-ж. негизделген. 1722-ж. кеңейтилип, 1847–56-ж. атайын имараттар (арх. Г. Земпер ж. б.) кошумча салынган. Галереяда 15–18-к-дагы итал. (Рафаэль, Жоржоне, Тициан
ж. б.), 17-к-дагы Голланд ж-а фламанд (Рембрандт, Я. Вермер, П. П. Рубенс ж. б.), испан (Д. Веласкес, Х. Рибера ж. б.), 17–18-к-дагы француз (Н. Пуссен, А. Ватто ж. б.), 16-к-дагы немис (А. Дюрер, Г. Гольбейн ж. б.) сүрөтчүлөрдүн чыгармалары коюлган ж-а 19–20-к-дагы европ. көркөм сүрөт мектептеринин (айрыкча немис мектеби) ж. б. өлкөлөрдүн сүрөтчүлөрүнүн чыгармалары кеңири орун ээлейт. 1945-ж. Д. с. г. талкаланып, 197 сүрөтү жок болгон, согуштун акыркы жумаларында немис фашисттери галереядагы чыгармаларды ылайыксыз жерге каткандыктан, көп сүрөттөр жараксыз абалга келген. Сов. Армиянын жоокерлери тапкан соң, ал сүрөттөр СССРге алынып келинип, калыбына келтирилген, имараттарда кайрадан көргөзмөгө коюлган. 1955-ж. ГДРге кайтарылып, 1956-ж. Дрезденде сүрөт галереясы кайрадан ачылган.