ДУЛАТОВА
ДУЛАТОВА Гүлшара (15. 4. 1930, Чүй облусу, Токмок – 1. 3. 2009, Бишкек) – Кыргыз ССР эл артисти (1977). 1946–1948-жылдары Токтогул Сатылганов атындагы Кыргыз мамлекеттик филармониясынын хорунда ырчы. А. Островский атындагы Ташкент мамлекеттик театр өнөр институтунун актёрдук бөлүмүн бүтүргөндөн (1953) Кыргыз мамлекеттик академиялык драма театрынын артисти.
Дулатова – ар түрдүү драмалык, трагедиялык жана сатиралык каармандардын образдарын чебер түзө алган кеңири диапазондуу актёр. Кыргыз улуттук академиялык драма театрында 100дөн ашык роль аткарган. Негизги ролдору: Канышай (К. Эшмамбетов, «Эгиз бала»), Галчиха (А. Островский, «Күнөөсүз күнөөлүүлөр»), Долли (Л. Толстой, «Анна Каренина»), Сахно (А. Софронов, «Ашпозчу аял»), Зуура (Б. Жакиев, «Атанын тагдыры»), Сейде (Ч. Айтматов, «Бетме-бет»), Наргүл (Т. Абдумомунов, «Каркыралар кайтканда»), Гүлбара (М. Байжиев, «Балдар бойго жеткенде»), Клея (Г. Фигейредо, «Эзоп»), Кей (М. Каоуру, «Уурдалган өмүр»), Эне (К. Чапек, «Эне»), Тангабике (М. Карим, «Ай тутулган түндө»), Айша апа (Ч. Айтматов, К. Мухамеджанов, «Фудзиямадагы кадыр түн»),
Чыйырды (Ж. Садыков, «Айкөл Манас»,) Канышай (Ж. Садыков, «Сейтек»), Толгонай (Ч. Айтматов, «Саманчы жолу») жана башкалар. Эл Достугу ордени, медалдар менен сыйланган.