ДРЕЗДЕН СҮРӨТ ГАЛЕРЕЯСЫ
ДРЕ́ЗДЕН СҮРӨТ ГАЛЕРЕЯСЫ – Германиянын Дрезден шаарындагы дүйнөдөгү атактуу сүрөтчүлөрдүн тандалган чыгармалары жыйналган көргөзмө (имарат). 1560-жылы негизделген. 1722-жылы кеңейтилип, 1847–1856-жылдары атайын имараттар (архитектору Г. Земпер жана башкалар) кошумча салынган. Галереяда XV–XVIII кылымдардагы италиялык (Рафаэль, Жоржоне, Тициан жана башкалар), XVII кылымдагы Голланд жана фламанд (Рембрандт, Я. Вермер, П. П. Рубенс жана башкалар), испан (Д. Веласкес, Х. Рибера жана башкалар),
XVII–XVIII кылымдардагы француз (Н. Пуссен, А. Ватто жана башкалар), XVI кылымдагы немис (А. Дюрер, Г. Гольбейн жана башкалар) сүрөтчүлөрдүн чыгармалары коюлган жана XIX–XX кылымдардагы европа көркөм сүрөт мектептеринин (айрыкча немис мектеби) жана башка өлкөлөрдүн сүрөтчүлөрүнүн чыгармалары кеңири орун ээлейт. 1945-жылы Дрезден сүрөт галереясы талкаланып, 197 сүрөтү жок болгон, согуштун акыркы жумаларында немис фашисттери галереядагы чыгармаларды ылайыксыз жерге каткандыктан, көп сүрөттөр жараксыз абалга келген. Советтик Армиянын жоокерлери тапкан соң, ал сүрөттөр СССРге алынып келинип, калыбына келтирилген, имараттарда кайрадан көргөзмөгө коюлган. 1955-жылы Германия Демократиялык Республикасына кайтарылып, 1956-жылы Дрезденде сүрөт галереясы кайрадан ачылган.