ДЫЙКАНДАР РЕФОРМАСЫ
ДЫЙКАНДАР РЕФОРМАСЫ (1861) – Россияда крепостнойлук укукту жойгон реформа. Дыйкандар реформасын жүргүзүү боюнча 1857-жылы жашырын комитет (кийин башкы комитет) ж-а губерниялык комитеттер түзүлгөн. 1861-жылы 19-февралда Александр II «Крепостнойлук укукту жоюу жөнүндөгү» манифестке ж-а «Крепостнойлук көз карандылыктан кутулган дыйкандар жөнүндө» жобого кол койгон (5-мартта жарыяланган). Анда дыйкандардын жеке керт башынын эркиндиги, жер үлүшү м-н камсыз кылуу ж-а кутулуу акысы тууралуу маселелер каралган. Жер үлүшүнүн акысын төлөө үчүн дыйкандарга 49 жылдык мөөнөт м-н насыя берилген. Помещиктердин ээлеген жерлери жеке менчикке калтырылган. Дыйкандар реформасынын натыйжасында 22,5 млн дыйкан крепостнойлук укуктан бошонгон.
Ад.: Зайончковский П. А. Отмена крепостного права в России. 3-е изд. М., 1968.
К. Алымкулов.