ДЭ′ ВИС
ДЭВИС Жон (1550-жылдар чен – 1605) – англиялык деңиз сүзүүчү. Арктиканы изилдеген. 1580-жылы 1-экспедициясын Арктикага жасап, Атлантика океанынын түндүк-батышында Тынч океанга өтүүчү өткөөлдү табууга аракеттенип, ал далалатын 1585-жылы кайталаган. 1586–87-жылдарда 2-экспедициясында Арктиканы Гренландиядан батышты карай изилдеп, кысык аркылуу (кийинчерээк анын атынан аталган) өткөн. Баффин кысыгын, Лабрадор жарым аралынын чыгыш жээгин, Гренландиянын батыш жээгин 73° түндүк кеңдикке чейин изилдеген. Фолкленд аралын көргөн алгачкы европалык адам болгон (1592).