ДИССИПАЦИЯ СИСТЕМАСЫ
ДИССИПА́ЦИЯ СИСТЕМАСЫ – багытталган процесстеги энергия багытталбаган процесстин энергиясына айланган динамикалык система. Механикалык диссипация системасында толук энергия (кинетикалык ж-а потенциалдык энергиялардын суммасы) энергиянын башка түрүнө (мисалы, жылуулукка) өтүп, энергиясы азаят. Бул процесс механикалык энергиянын диссипациясы (чачырашы) деп аталат. Диссипация системасынын кыймылы акырындоочу, басаңдоочу, ошондой эле ылдамдоочу кыймыл болот. Беттешкен катуу нерселердин кыймылына каршы аракет эткен суюк же кургак сүрүлүү күчү, чыңалуусу деформациянын ылдамдыгына көз каранды болгон илээшкек чөйрө диссипация системасына мисал болот.