ЖАЛГАСЫНОВА
ЖАЛГАСЫНОВА Дарыйка (20. 3. 1941-ж. т.‚ Талас обл.‚ Кара-Буура р-ну‚ Чолпонбай айылы) – ырчы (лирика-драмалык сопрано)‚ Кыргыз ССРинин эл арт. (1983).
П. И. Чайковский атн. Москва мамл. консерваторияны бүткөндөн (1966) Кыргыз акад. опера ж-а балет театрынын‚ 1978- жылдан Кыргыз мамл. телерадиокомитетинин симф. оркестринин солисти. Классикалык ж-а улуттук операларда аткарган партиялары: Калыйман‚ Зулайка‚ Чынар (А. Малдыбаев‚ В. Власов‚ В. Фере‚ «Айчүрөк»‚ «Манас»‚ «Ажал ордуна»)‚ Ширин (А. Аманбаев‚ «Бойдоктор»)‚ Зияда (Н. Давлесов‚ «Аста-секин колукту»)‚ Маргарита (Ш. Гуно‚ «Фауст»)‚ Ксения (М. Мусоргский‚ «Борис Годунов»)‚ Лиза (П. Молчанов‚ «Бул жердин таңы бейкут») ж. б. Кыргыз комп-лорунун‚ обончулардын ыр-романстарын чебер аткарат. Дүйнөнүн көп өлкөлөрүндө гастролдо болгон. 2001-ж. Ж-нын «Замандаштарга эстелик» аттуу ыр жыйнагы чыккан. Медалдар м-н сыйланган.