ЖАМААТ
ЖАМААТ – адамдардын шериктешүү формасы; өндүрүш каражаты жалпы менчик болуп, чарбаны биргелешип жүргүзүүгө, өндүрүлгөн нерселерди тең бөлүштүрүү негизинде пайда болгон коом. Уруучулук коомдогу Ж. өндүрүштүк, үйбүлөлүк, тиричиликтик, идеол. функцияларды жөнгө салган маанилүү социалдык организм болуп саналган. Коомдошуп жашоосунун бара-бара татаалданышы м-н адамдардын топтошуп жашоолору да алардын ири ж-а чакан топторун жаратты. Айылдык, коммуналдык, конфессиялык, улуттук ж. б. Ж-тар келип чыкты. Ж-тар карама-каршы функцияларды аткарып келүүдө. Бир жагынан бул өз мүчөлөрүн калкалап алууга жөндөмдүү демокр. ин-т болуп саналса, экинчи жагынан Ж. мамлекет ж-а адамдар тарабынан фискалдуу максаттарга, б. а. жамааттык жумушта ар бир мүчө бири бирине кепил болуп, алардын жооптуулугу сыяктуу каражаттар катары пайдаланылган. Ө. ж. өндүрүшү м-н тикелей байланыштуу жаралган соода-сатык мамилелери элеттик Ж-тарды талкалап, алардын ордун фермер чарбалары ж-а латифундисттер ээлеген. Маркетинг системасынын европ. өнүгүү шарттарында шаардык Ж-тар да талкаланып жок болгон. Бирок, Азия, Африка ж-а Америка континенттеринин айылдык Ж-тары азыркыга чейин сакталып, өз жашоосун улантууда. Азыркы кездеги Ж-тар өз мүчөлөрүнүн биргелешкен ишмердүүлүгү м-н бириктирилген ж-а жерг. өз алдынча өзү башкарган системага ээ социалдык майда уюм болуп саналат.