ЖОЛУМ ҮЙ
ЖОЛУМ ҮЙ – абдан кичине жеңил боз үй. Ал үч канат керегеден, ага жараша ууктан, түндүктөн турат. Айрым жерде Ж. ү. кереге, түндүксүз эле ууктан узунураак таяктардын бир учу жерге сайылып, түндүк ордуна бир кулач ичкерээк талдын эки башы бириктирилип, көк м-н байланып тигилет. Ал түндүк сымал тегерек талдын арасы баштан аяк сызма же жоондугу сөөмөйдөй кыл жип м-н ачык оролот. Жерге сайылган таякчалардын экинчи учу оролгон жиптерге киргизилип, үстүнө эски үзүк же таар жабылат. Ж. ү-дү мурда жылкычы, койчу, жоокер, соодагерлер урунган. Учурда Ж. ү-дүн ордуна чатыр кеңири колдонулат.