ЗАРДОБУКА СЫМАП КЕНИ
ЗАРДОБУКА СЫМАП КЕНИ Ош обл-нын Кара- Кулжа р-нунда, Чыгыш Алайдын Тоголок-Таш тоосунун кырында, Көк-Суунун баш жагында, деңиз деңг. 3850–4070 м бийиктикте. 1970– 72-ж. издөө иштери жүргүзүлгөн. Кен аймагы меридиан багытындагы тик жарака м-н үзүлүп, төмөнкү-ортоңку девондогу жанартоо-терриген тектери м-н жабылган антиклиналдык бүктөлүүгө дуушар болгон силур м-н төмөнкү девондун акиташ тектери түзөт. Кенташ эффузия ж-а акиташ тектеринин кошулган жериндеги жаракалуу зона м-н туташ жаткан акиташ тегинин оң тилкесине (туурасы 50–200 м) топтолгон. Штокверк, жарака ж-а уя сымал кенташ тулкуларынын калыңдыгы 5–25 м, уз. 100 мге чейин. Кенташ жалаң киновардан ж-а нукура сымаптан турат. Сымаптын өлчөмү бардык жерде бирдей эмес, орточосу – 0,58%. Кендин 20 м тереңдикке чейинки эсептелген запасы 1213 т.