ЖЕЛЕ

ЖЕЛЕ – 1) кулун тизип, байлоого ылайыктал­ган ыкма. Ал кыл аралаштырылган жүндөн жоон эшилип, үч-төрт катталып чыйратылат. Узундуг 15–20 м келет. Желенин эки учу эки казыкка байланат. Ар кайсы жерине аралыгын бир м жыгач (арча, четин, кайың) тээктүү чыкта бекитилет. Бир желеге 15–20 кулун байланат; 2) туу куйруктан жасалган бир нече кылтакты өтө жүйүр бекитип, бышык жиптен же кылдан чыйратылып жасалган илбээсин кармаш үчүн аңчылык куралы. Муну к ы л т а к желе же т у з а к желе деп да аташат. Желе 5–6 же 10–15 көздүү (кылтактуу) жасалат. Ал көбүнчө кеки­лик, чил, каракур, бактек жана жапайы көгүчкөн, айрым учурда улар, жапайы каз, өрдөктөргө урунт жерге тартылган; 3) катуу жыгач, сөөк, темир жана болоттон жасалган бөрү тил кайыр­мак байланган балык кармоочу курал. Анын

боосу да кылдан кабатталып жасалган. Кайыр­мак жок кезде желени суу түбүнө тартып балык кармашкан. Балык кармоого анча оңтойлуу бол­богондуктан, желе кылдарынын учуна түрдүү ка­йырмактар байлана баштаган. Муну да желе деп аташкан. Анда 20дан 50гө чейин кайырмак бо­лот. Желени ышкыбоз балыкчылар гана эмес, балык өндүрүшүндө да балыктын айрым түрүн тандап кармоо үчүн колдонот.