ЖЕҢИШ ЧОКУСУ
ЖЕҢИШ ЧОКУСУ – Теңир-Тоодогу, ошондой эле Кыргызстандын аймагындагы эң бийик чоку. Какшаал тоо тизмегиндеги Чоң Ак-Тоо тоосунда жайгашкан. Бийиктиги 7439 м. Чоку бүт кар, мөңгү менен капталган.
Төбөсү тайпак, плато сымал. Негизинен силурдун сланец тектеринен турат. Бийиктиги 1943-жылы аскер топографтары тарабынан аныкталып, Советтик Армиянын фашисттик Германияны жеңишинин урматына аталган. Чокуга алгачкы жолу 1956-жылы 30-августта В. Абалаков жетектеген советтик альпинисттер чыккан.